दिवाळी लक्ष्मीपूजन ही भारतीय संस्कृतीतील वैशिष्ट्यपूर्ण पूजा आहे. आश्विन महिन्यातील अमावास्येला संध्याकाळी ही पूजा प्रतिवर्षी केली जाते.दिवाळी मध्ये लक्ष्मी पूजनाला अधिक महत्त्व दिले जाते. आश्विन अमावास्येच्या रात्री लक्ष्मी सर्वत्र संचार करते आणि आपल्या निवासासाठी योग्य असे स्थान शोधू लागते. जेथे चारित्र्यवान, कर्तव्यदक्ष, संयमी, धर्मनिष्ठ, देवभक्त आणि क्षमाशील पुरुष आणि गुणवती आणि पतीव्रता स्त्रिया असतात, त्या घरी वास्तव्य करणे लक्ष्मीला आवडते, अशी आख्यायिका आहे.

असे मानले जाते की घरात लक्ष्मीची पूजा केल्यास आशीर्वाद राहतात. ज्या घरांमध्ये लक्ष्मीची पितळी किंवा चांदीची मूर्ती आहे, तिची दररोज विधिवत पूजा करावी. यामागे केवळ धार्मिक महत्त्व नाही, तर एक संपूर्ण मानसशास्त्र आहे, जे आपल्याला पैसे कमवण्यास आणि त्याचा योग्य वापर करण्यास प्रवृत्त करते.